ويزو تبكي بسبب طفليها وتتحدث عنهما

حلت الفنانة دينا محسن الشهيرة بـ"ويزو" ضيفة على برنامج "أسرار النجوم" الذي تقدمه إنجي علي عبر إذاعة وقناة "نجوم FM".

وخلال فقرة تفتح فيها ويزو ورقة مكتوب فيها اسم شخص ما لتوجه له رسالة، لم تتمالك دموعها عندما وجدت اسم طفليها "إسماعيل ومسك" في الورقة.

وقالت: "الولاد غاليين أوي هما نقطة ضعفي، نفسي أشوفهم صالحين وراضيين ربنا، معنديش مشكلة أنهم يمثلوا لكن مش دلوقتي لأني بشوف الأطفال اللي بتمثل طفولتهم بتتدمر".

أضافت: "نفسي أعلمهم أنهم يخافوا من ربنا جدا وأعلمهم يبقوا واثقين في نفسهم وبيحبوا أبوهم وأمهم، أنا مسميه "إسماعيل" على اسم سيدنا إسماعيل عشان يبقى بار بينا، اسم "مسك" لما عرفت إني حامل في بنت كل أسامي الدلع جات في بالي، واخترت اسم "مسك" وفي يوم كنا بنتفرج أنا وشريف جوزي على فيلم "حامل اللقب" وأول حاجة اتقالت لدينا الشربيني أن اسمها "مسك شريف" فاخترناه".

كما تحدثت عن صعوبات التربية قائلة ويزو: "الولد تربيته أسهل من البنت، مسك عندها سنتين وإسماعيل 5 سنين، البنت مش هتعرفي تزعقي ليها ولا تكسريها لو عملتي كده هتتعود على ده ولو أي حد في المجتمع الخارجي عمل معاها كده هيبقى بالنسبة ليها عادي، البنت لازم يبقى عندها نوع من أنواع الثقة بالنفس أكتر، أما الولد صحابه هيعلموه أصلا أن هو يبقى عنده ثقة في النفس ويقولوا أنشف أنت راجل، لكن البنت لازم تبقى رقيقة وأنثى وفي نفس الوقت قوية وعندها شموخ، لاحظت أن تربيتها أصعب".

يذكر أن ويزو شاركت كريم عبد العزيز وهنا الزاهد مؤخرا في مسرحية "الباشا" التي عرضت في موسم الرياض.