الصحفي فتحي بن لزرق يوجه رسالة للسكان بعدن بشأن الخروج

كريتر سكاي: خاص

وجه الصحفي فتحي بن لزرق رسالة للمواطنين بعدن بشأن الخروج للمظاهرات

وقال بن لزرق في منشور عبر حائط صفحته الرسمية بموقع فيسبوك:

لاتخرجوش

نصيحتي للناس في عدن، سأكتبها بالعدني وباللهجة العامية..

لاتخرجوش تتظاهروا، عملت لكم بالله ايش المظاهرات من عشر سنين وأكثر..

بلغة أهدى وأوضح وأعمق..

هل المظاهرة للكهرباء، هل هي للمياة؟ هل هي لرواتبكم اللي جلست عشر سنين تروح لحساباتهم في البنوك التجارية؟

قبل ما تفكر تخرج وتروح، اعطني عقلك اللي اختطفوه منذ ١٩٦٧ وتعال ندردش شوية.

بتقولي البلاد كلها مختطفة..

صحيح ياعم، بس لو ما اختطفوا عقلك ما كان قدروا يختطفوا البلاد..

بتخرج ليه؟ علشان ناس حكمت ١٠ سنين، البحر بيده والبر والميناء والجمارك والأمن والدفاع والسجون، يا رجال حتى أحواض المجاري اللي كنت تخري فيها انت وهم كانت بيدهم..

صلحوا ايش للناس؟

عفوا على هذه الألفاظ، بس لأننا بوضع خرى محتاجين ننزل الرتم شوية..

وتابع بالقول:

بتخرج تتظاهر ليه؟

علشان ناس فلتوا ل٣٢ لواء ودولة بحالها، ومنتظرين منك انت المسكين تخرج لساحة العروض ترجعها لهم؟

بتخرج ليه؟ هؤلاء اللي انت ناوي تتظاهر علشانهم بكرة عملوا لك ايش؟

نفعوك بحاجة..

أسرهم فين؟ اموالهم كم مليارات؟

معقولة انت الكحيان الضبحان تخرج علشان ناس امتصوا دمك وحياتك ومستقبلك وكل حاجة فيك عشر سنوات.

لاتصدق موضوع القضية ، القضية سلّم بالنسبة لهم ، القضية مطيّة.

واضاف في منشوره قائلاً:

تعال ياخي اجلس وفكر شوية، خلينا نعطي السلطة المحلية الجديدة فرصة، للناس اللي جت بدالهم فرصة.

أما هؤلاء فهم طول حياتهم وهم يتظاهرون خارج السلطة، ويتظاهروا شوية من السلطة، يتظاهروا، كل السلطة معهم ويتظاهروا.

وخرجوا من السلطة ويتظاهروا ولو رجعوا يحكموا بيتظاهروا.

واختتم بالقول:

ارجوك كون عاقل، يلا عدن تجاوزت هذه الأزمة بسلام، فمتكونش جزء من الأضرار بنفسك.

صيّح للحرمة وخليها تعمل لك قلص شاهي ملبّن يمز الرأس، وخليها تحبل "بربح"..

"تحية" ياعم..