محامي شيرين يكشف حقيقة إفلاسها واعتزالها.. ومفاجآت قريبة

طالب ياسر قنطوش، المحامي بالنقض ومحامي الفنانة شيرين عبد الوهاب، وسائل الإعلام ومواقع الأخبار بتحري الدقة في نشر الأخبار المتعلقة بالفنانة، قائلًا: بطلب منهم بس تحري الدقة، الست كل يوم تلاقي حاجة مكتوبة عنها ومحصلتش، أنا شخصيًا محامي ومستشار وبتفاجئ.

وأضاف، خلال مداخلة هاتفية ببرنامج الصورة الذي تقدمه الإعلامية لميس الحديدي على شاشة النهار: “من المفارقات اللي استغرب لها شخصيًا إني محامي، وتفاجأت إن مستشار ومحامي الموسيقار والموزع محمد مصطفى تفاجأ بخبر منعها من رؤية بنتيها، ومازحته قلت له: عندك محامي غيري؟ قال لي: معرفش”.

وعن حالتها قال: “شيرين كويسة طول الوقت، عندها شغل بتشتغل عليه حاليًا، وبتحضّر لأغاني ومفاجآت، وربنا يقويها وتبقى أحسن وأحسن، وهو صوت لا يختلف عليه أحد”.

وعن وجودها في الخارج ومدة تلقيها العلاج قال: شيرين في بيتها في مصر وبتعيش حياتها بشكل عادي، والبنات معاها، وبيتبادلوا الزيارات بين الأب والأم، ولا يوجد أي مشكلة بينهما، ولا يوجد أي منع من قبل الأب، الزيارات متبادلة، وحتى هو شخصيًا مستغرب من الخبر.

وعن وجود أزمة مالية تتعرض لها الفنانة، وأنها تبيع أملاكها، قال: أمورها المادية ممتازة جدًا، ولديها ثروة عقارية ضخمة، نمسك الخشب، وحساباتها المصرفية منتظمة.

وردًا على سؤال الإعلامية لميس الحديدي: هل برأيك تحتاج لفترة تعافٍ حتى تعود للناس؟ قال: أي حد بيدخل في أزمة أو مشكلة مع حد بياخد وقت عشان يتعافى، بصرف النظر إن مشاكل شيرين وأزماتها كانت كثيرة مع شقيقها وطليقها حسام حبيب، وهو طليقها، وإحنا بنتكلم كتير تليفونيًا، ولما بيكون في حاجة مهمة بنتقابل، وآخر لقاء كان منذ شهر.

ونفى أن يكون لديها نية الاعتزال، قائلًا: مافيش الكلام ده، هي مكملة، ولديها أغاني ستنزل قريبًا، وهناك موزعون وملحنون بيتابعوا معاها وبيتعاملوا معاها في الفترة الحالية.