كريتر سكاي/خاص:
كتب/طه العراسي
قبل امس لقيت مبلغ 55 الف ريال فى الشارع عندنا في الجراف جنب حارتنا !
المبلغ مكون من فئتين
40 ألف فئة 1000 ريال
15 الف فئة 500 ريال
ونزلت منشور فى جروب الحارة في الواتس لانو به ناس خيرات من ايام الازمه حق الغاز وقلت لهم اننا لقيت مبلغ والذي يقول كم المبلغ ويذكر الفئات صح يتصل لي !!
المهم طبعا الاتصالات اشتغلت ولاوقفت
واحد اتصل لي بيقول كم الفلوس الذي انت لقيتها ياعم
قلت ليه ليش بتسأل
قال علشان لو احد سأل عليها
اديت له المقسوم وسمعته كلمتين حاليات وقفلت
الثانى بيتصل بيقول مساء الخير ياخووي
معاك اخوك محمد ال%%@& ساكن جنب المؤيد عند الفرن !
وينو بيتكم ياعم علشان اجى اشل الأمانة
قلت له ايش من أمانه !!
قال لي الزلط الذي لقيتها ياخوووي
قلت له كم الملبغ
قال ورب الكعبة ياخوي اننا شليتهن من زوج اختى مربوطات ولاعديتهن !!
قلت له طيب اتصل على زوج اختك واعرف منه المبلغ كم!!
قال والله ان تلفونه ضايع وراس امي !!
قلت خلاص اتصل على اختك وخليها تعرف من زوجها
قال سابر يا خوووي بس انتبه تصرف الزلط يامنعااه !!
شويه واتصلت واحده عجوز بتبكي
وبتقول الحمد لله أنهم ضاعو عندك انت
قلت لها كم المبلغ ياحجه
قالت مايعجبنيش اعد علشان لاتقل بركة الزلط !!
قلت لها هيا ياحجه مره ثانيه كوني عدي الزلط وغلقت !!
بعد اتصل واحد بيقول شل منهم حلالك 10% وانا اجيلك اشل الباقى
قولتله الـ 10% كم عتطلع !!
قال كم ما طلعين انت واخلاقك !!
قلت له يعنى المبلغ كم علشان اعرف كم شاشل !!
قال هن ببركة الباري تقريباً فوق العشرين ألف
برضو وقع له كلمتين وغلقت !
لوما اتصل واحد شكله محترم جدا !!
وبكل ذوق بيقول لوسمحت ياخي
انت الذي لقيت الفلوس
وانا ضايع عليا مبلغ 55 الف
مواصفاتهم كذا وكذا
قلت له صح
والتقينا يوم ثاني عند الجامع وشل فلوسه وجاب لي ثلاث اقفاص تمر !
دخلت اصلى وانا معايا التمر !!
كملت اصلي وماعاد لقيت التمر !!
لو سمحتو الذي لقي التمر في الجامع يرجعهن !
تابعوا آخر أخبارنا المحلية وآخر المستجدات السياسية والإقتصادية عبر Google news