الفنانة رانيا محمود ياسين تكشف سرّاً عمره 30 عاماً

كشفت الفنانة رانيا محمود ياسين عن سرّ يذاع للمرة الأولى حول فيلمها "قشر البندق" الذي قدّمته قبل ثلاثين عاماً في أولى بطولاتها السينمائية، حيث عبّرت عن سعادتها بعرض النسخة المرمَّمة من الفيلم ضمن الدورة السابعة من "مهرجان الجونة السينما"، مشيرةً إلى أن الفيلم ظلم لسنوات طويلة ولم يأخذ حقه.

وقالت رانيا: "فيلم "قشر البندق" هو اللي غيّر شكل السينما المصرية وعمل جيل جديد، وليس فيلم "إسماعيلية رايح جاي"، الفيلم ده قدِّم محمد هنيدي بشكل جديد وهو كان نجم وعامل أفلام قبلها، إنما اللي غيّر شكل السينما فهو "قشر البندق" اللي طلّع جيل جديد".

وأضافت: "قابلت شاب عنده 20 سنة سألني هو مين كان مع حضرتك في الفيلم؟ قلت له هات ورقة وقلم: محمد هنيدي وعلاء ولي الدين وعبلة كامل ودينا وحميد الشاعري وأبويا الله يرحمه وأستاذ حسين فهمي وأستاذة مريم فخر الدين وخالد الصاوي وطارق لطفي، والفيلم قدّم جيل كامل، لكنه اتظلم لأنه أتاخد حقوق ملكيته لقناة عربية مشفّرة، مش كل الناس بتشوفه لكن هو تجارياً نجح، دا الفيلم الوحيد اللي أبويا كسب فيه كإنتاج، هو أنتج أفلام تانية لكن دا الفيلم اللي قدر يكسب فيه".

وكشفت رانيا محمود ياسين أنها ستحاول إعادة عرض الأعمال التي أنتجها والدها الراحل ولم تحقق نفس الشهرة، والبداية كانت مع "قشر البندق" إذ قالت: "الفيلم هيتشاف كتير الفترة اللي جايه داخل مهرجان "قرطاج" وهنشوفه على المنصات، والفضل في ده يرجع للأستاذ سامح فتحي، هو اشترى الفيلم لأني مكنتش هقدر أعرف أسوّقه بالطريقة بتاعته، هو دخل في رحلة صعبة عشان يوصل للعقد القديم وأنا مش حاسه إنه راح مني، وهشتغل على أفلام اللي والدي أنتجها إنها ترجع تظهر للنور، مثلاً "الجلسة سرية" دا إنتاجنا وبيتعرض كتير فدا مش هعمل له حاجة، اللي اتظلم هحاول أظهره للنور، أبويا تعب عشان يعمل الأفلام دي".

فيلم "قشر البندق" من إنتاج عام 1995 وهو بطولة الفنانين: محمود ياسين وحسين فهمي ورانيا محمود ياسين وعبلة كامل ومحمد هنيدي وعلاء ولي الدين وحميد الشاعري، ومن إخراج خيري بشارة.