كريتر سكاي/خاص:
ونحنا مسافرين للقاهرة اني وعمتي.. بالصدفة صادفنا هذه المرأة بصالة الانتظار وكانت بشوشه جدا ومبتسمة سلمنا عليها واتعرفنا بها وكانت من الطف اللحظات الي اتكلمنا فيها مع بعض وسبحان الله عرفنا انها السفيرة الفرنسيه برغم انها ماعرفت عن نفسها مباشرة بأنها سفيرة .. عرفنا من مدير الصاله
دقايق معدودة ولكن سبحان الله والوعي والثقافة الي عندها جلسنا نتكلم معاها بشكل عفوي وبسيط وتناقشنا معاها وكأنه نفسها تغير شي بذي البلاد بشكل ملموس و جاد .. سألتني اذا اللغة الفرنسيه لها قبول عندنا وهل تعتبر مهمه وهل نفسكم تتعلموها .. قلت لها زمان كانت مادة الفرنسي مادة اساسيه تُدرّس في مدارسنا ( الحكوميه) كانت معلمتنا لمادة الفرنسي معلمة مصريه وكانت مادة ممتعة جدا… لما عرفت ذا الشي فرحت جدا وقالت هل بيكون اقبال عليها الان في المدارس؟
كان نفسي اجاوبها بكل حماس اكيييد بس للاسف تذكرت انه فين المدارس
ياسفيرة اصبح المعلم عندنا بلا قيمة والتعليم اساسه المعلم .. هذا الشي ماقلته و كتمته بقلبي بحزن وهزيت راسي فقط
وجاوبتها انه في الوقت الحالي تعليم اللغة الفرنسية بشكل عام اصبح شبه معدوم ويكاد الا يذكر
وعلى نياتها سالتنا كيف نقدر نرفع الوعي الثقافي هنا في البلاد هل بنقدر ؟ هل بيكون في اقبال ؟؟ برضه حززززت في نفسي دي الجملة وذكرت ايام زمان كنا نحتاااار من كثر المعاهد والمواد الي كنا ندرسها في مدارسنا وكانت تجي لنا وفووود اجانب يشرفو بنفسهم على التعليم وعلشان نتعلم اللغات بانواعها
جاوبتها بابتسامة I hope
فعلا .. اتمنى من كل اعماق قلبي من المسؤولين والقائمين ببلادنا يكفي اهمال ولازم يهتمو اكثر لهذا الجانب طالما في ناس تشتي تبادر .. بلاش نشحت فلوس بلااااش تاااكلو وتنهبو
اشحتو لنا علم ..
نشتي ووووعي ..
نشتي جيييييل متعلم ومثقف يرفع من شأن هذه البلاد
.. لو سمحتو نشتي جيل نظظظيف فكريا وعلمياً والاجيال اساسها التعليم والوعي
كتب/سمر بركات
تابعوا آخر أخبارنا المحلية وآخر المستجدات السياسية والإقتصادية عبر Google news