هل مزيلات العرق تسبب سرطان الثدى؟

شهر أكتوبر هو شهر التوعية بسرطان الثدى، وحذرت الدكتورة نجلاء عبد الرازق أستاذ الأشعة التشخيصية والتداخلية بطب قصر العينى، عبر صفحتها "فيسبوك "، من استعمال مزيلات العرق المحتوية على الألمونيوم.

وأضافت:" بحكم عملى كمتخصصة في الكشف عن أورام الثدى كل يوم بشوف مشاكل في الغدد الليمفاوية، أو وجود ألم و تضخم من غير وجود أورام أو أسباب مرضيه، و ده غالبا يكون نوع من الالتهاب المزمن بسبب ترسب الألومنيوم داخل الغدد الليمفاوية".

وقالت:" منين جه الألومنيوم؟ الألومنيوم أو هيدروكسيد الألومنيوم موجود في بعض مزيلات العرق و كمان الشبة ( علشان ناس كتير بتقولي باستعمل "الشبة"، باعتبارها حاجه طبيعية، وقد وجد إن الشبة كمان فيها ألومنيوم".

هل تسبب مزيلات العرق السرطان

أضافت الدكتورة نجلاء:" طيب الكلام ده يعمل سرطان؟ في الأغلب لا ملوش علاقة دراسات كتير اتعملت و أثبتت إنه ملوش علاقه، و لكن هو بيضخم الغدد الليمفاوية، وأحيانا يعمل ألم و بيعدي الحاجز الدموي المخ و ممكن يبقي سبب في الزهايمر المبكر" .

البدائل الآمنة

قالت إنه يجب أن نستعمل مزيلات العرق التي لا تحتوي علي مركب الألومنيوم، مضيفة:" في حاجات بيبقي مكتوب عليها ألومنيوم Free أي خاليه من مركب الألومنيوم، أو احنا نجتهد و نقرا اللي مكتوب قي المكونات الحاجات اللي المادة الفعالة بها ساليسلات كويسة، و بلاش الومونيوم و بلاش "الشبة".

وأوضحت، أن سرطان الثدي أهم سرطان يصيب السيدات، ويعتبر العامل الوراثي أهم العوامل المسببه للمرض، بمعني وجود استعداد جيني و "مش شرط نعمل التحليل علشان نعرف لكن تاريخ العيلة بيبين، الجينات المسببة للسرطان هما اثنين أساسيين وهما BRACA1 و BRACA2".

وأضافت، أن الأول BRACA1 يحمل استعدادا لسرطان الثدي والقولون و المبيض و الجين الثاني يحمل الاستعداد للثدي والبنكرياس و البروستاتا، " ده معناه إيه؟ إن ظهور أي أنواع من السرطانات دي في العيلتين يعني عيله الأب أو الأم معناه استعداد سرطان الثدي، وعيله الاب مهمه ذي عيله الأم يعني عمتك قريبتك عادي وعمك كمان، لأن الصفات الوراثية المحمولة علي الجينات بنأخد نصها من ناحيه الأب ونصها من ناحيه الأم".

ونصحت:"الناس بقي اللي عندها استعداد وراثي في العيله يعملوا ايه ؟ الكشف الدوري و نحط مليون خط تحتها و يبدأ من سن الأربعين أو قبل، لأن هدفنا نشوف قبل ما يحصل، نسبقه يعني بالكشف بالماموجرام، ولكن لو اضطرينا نبدأ قبل سن الــ 25 يبقي موجات فوق صوتيه على الثديين، ده كل سنة و التوصيات العالمية كمان بتحط الرنين المغناطيسي في الكشف الدوري في حال هنبدأ في سن مبكر أو في حال الثدي الكثيف ( يعني اللي أغلبه غدد و الدهون قليله) .